ҚАЗАҚСТАНДЫҚ САДАҚШЫЛАР АЗИЯ ОЙЫНДАРЫНДАҒЫ ЖЕКЕЛЕЙ САЙЫСТЫ АЯҚТАДЫ

Жапонияның Айти префектурасы мен Нагоя қаласында өтіп жатқан XX жазғы Азия ойындарында садақ атудан жекелей сайыстың плей-офф кезеңі өтті. Қазақстан Республикасының ұлттық құрамасы сапында өнер көрсеткен спортшыларымыз құрлықтың үздік мергендерімен бақ сынады.

Классикалық садақ атудан ерлер арасындағы бәсекеде Ильфат Абдуллин жарысты сәтті бастап, 1/16 финалда Филиппин өкілі Мхейвен Колас Часты 7:3 есебімен жеңді. Алайда 1/8 финалда Өзбекстан спортшысы Амирхон Садиковпен кездесіп, 3:7 есебімен жеңіліс тапты.

Қазақстандық тағы бір мерген Дәулеткелді Жаңбырбай 1/16 финалда Бангладеш садақшысы Кришна Саха Раммен кездесіп, 4:6 есебімен қарсыласына жол берді.

Әйелдер арасындағы сайыста Александра Землянова 1/16 финалда Моңғолия өкілі Оюн-Ердене Юаасандоржды 6:0 есебімен сенімді түрде жеңді. Дегенмен келесі кезеңде Тайпей спортшысы Цай-Чи Лиге қарсы өткен кездесуде 2:6 есебімен есе жіберді.

Ал Самира Жұмағұлова 1/16 финалда Индонезия өкілі Резза Октавиамен кездесіп, 3:7 есебімен жеңіліп, жарысты аяқтады.

Осылайша, Қазақстанның классикалық садақ атудан жекелей сайыстағы спортшылары Азия ойындарындағы өнерлерін аяқтады. Спортшыларымыз құрлықтың үздік садақшыларымен бәсекеге түсіп, халықаралық деңгейде тәжірибе жинақтады.

📸 Никита Басов