Алматы облысында орналасқан Алматы Олимпиадалық даярлау орталығы базасында садақ атудан Қазақстан Республикасының ұлттық құрама командасы жоспарлы оқу-жаттығу жиындарын өткізуде.

Қазіргі таңда ұлттық құраманың спортшылары алдағы маңызды халықаралық додаларға — Азия ойындары мен Олимпиада ойындарына жан-жақты дайындық жүргізіп, физикалық және техникалық деңгейін арттыруда. Жаттығу процесі жоғары қарқынмен өтіп, әрбір спортшының жеке шеберлігін жетілдіруге, жарыс тәжірибесін кеңейтуге және командалық үйлесімділікті нығайтуға бағытталған.

Оқу-жаттығу жиындары спортшылар үшін тек дайындық кезеңі ғана емес, сонымен қатар халықаралық арена алдындағы стратегиялық маңызды саты болып табылады. Бұл кезеңде спортшылар психологиялық тұрақтылықты қалыптастырып, заманауи әдістемелер негізінде өз мүмкіндіктерін барынша ашуға мүмкіндік алады.

Сонымен қатар, оқу-жаттығу үдерісінің сапалы ұйымдастырылуы мен жүйелі қолдау көрсетілуі — болашақ жетістіктердің берік негізі. Бұл орайда Қазақстан Республикасы Туризм және спорт министрлігі мен Қазақстан Республикасының Ұлттық садақ ату федерациясының президенті Азамат Есентайұлы Усимбеков тарапынан көрсетіліп отырған қолдаудың маңызы ерекше.

Ұлттық құрама атынан аталған қолдау мен қамқорлық үшін шынайы алғысымызды білдіреміз. Еліміздің спорт саласын дамытуға бағытталған бұл жүйелі жұмыстар алдағы уақытта да жалғасын тауып, Қазақстан садақ атушыларының халықаралық деңгейдегі биік жетістіктеріне жол ашады деп сенеміз.

Біздің мақсат — көк туымызды әлемдік аренада биікке көтеріп, ел сенімін толық ақтау.