Ұлттық ғылыми-практикалық дене шынықтыру орталығы мен Қазақстан Республикасының Ұлттық садақ ату федерациясы арасында өзара ынтымақтастық туралы Меморандумға қол қойылды.

Құжатқа Орталықтың бас директоры Арман Ташметов пен Қазақстан Республикасының Ұлттық садақ ату федерациясының өкілдері қол қойды.

Аталған Меморандум елімізде садақ ату спортын жүйелі дамытуға, саланың ғылыми-әдістемелік базасын нығайтуға және спортшыларды даярлау сапасын арттыруға бағытталған маңызды құжат болып табылады. Тараптар спорт саласындағы өзара тәжірибе алмасуды кеңейтіп, бірлескен жобаларды жүзеге асыру арқылы садақ ату спортының дамуына серпін беруді көздейді.

Ынтымақтастық аясында балалар мен жасөспірімдер спортын дамыту, спорттық резервті даярлау жүйесін жетілдіру, жаттықтырушылар мен спорт мамандарының кәсіби біліктілігін арттыру, ғылыми-зерттеу және әдістемелік жұмыстарды ұйымдастыру, сондай-ақ республикалық және халықаралық деңгейдегі семинарлар, конференциялар мен оқу бағдарламаларын өткізу жоспарлануда.

Сонымен қатар тараптар бұқаралық спортты дамытуға, салауатты өмір салтын насихаттауға және садақ ату спортын өңірлерде кеңінен дәріптеуге ерекше назар аударатын болады. Бұл өз кезегінде спортқа қызығушылық танытатын жастардың қатарын көбейтіп, болашақта халықаралық ареналарда ел намысын қорғайтын талантты спортшыларды тәрбиелеуге мүмкіндік береді.

Меморандум аясында жүзеге асырылатын бастамалар спортшылардың дайындық деңгейін арттыруға, заманауи оқу-әдістемелік бағдарламаларды енгізуге және ұлттық құрамалардың бәсекеге қабілеттілігін күшейтуге бағытталады.

Тараптар алдағы уақытта бірлескен жұмыстың нақты нәтижелерге қол жеткізіп, садақ ату спортының дамуына тың серпін беретініне сенім білдірді.

Алда – ауқымды жобалар, нәтижелі серіктестік және отандық спорттың өркендеуіне бағытталған маңызды бастамалар күтіп тұр.